話咁快又到咗9月1開學日,不過由於新冠疫情關係,今個學年開學又要繼續在家上堂。小朋友不嬲活潑好動,要佢哋長時間坐定定喺屋企對住個mon上堂,真係好難。協康會職業治療師楊志凱就建議,家長適當調適家居環境,令小朋友保持專注學習。

楊志凱指,網上學習嘅形式較單一,唔容易長時間保持有趣,又缺乏老師、學生之間嘅互動,小朋友難以保持集中。而喺屋企上堂,亦有太多引誘,導致小朋友容易分心。對此,楊志凱就建議3個方法俾家長,幫助小朋友保持專注力。

1.提供安靜、少雜物嘅環境

家長可以喺屋企劃開一個寧靜小角落,俾小朋友上堂學習。而檯面要保持整潔,將容易令小朋友分心嘅玩具、手機等物件移走。

2.俾小朋友有調節空間

要小朋友長期保持坐喺度專注上堂十分困難,佢哋需要持續嘅感覺刺激以保持專注。家長可以俾佢哋每隔一段時間伸展一下手腳、飲啲水、食下點心等,令小朋友保持「醒神」。

3.安排有規律嘅作息時間表

家長應重整小朋友嘅作息時間,如穩定嘅瞓覺時間、早午晚三餐定時,有固定時間學習同遊戲。但要留意唔好過度催谷小朋友,安排太多課堂外嘅學習活動,以免佢哋缺乏休息同調節自己嘅時間。

圖:中新網