哥哥結婚咁大件事點會唔預埋細佬呀?不過美國有個患上唐氏綜合症嘅弟弟Henry就真係有小小自卑,驚自己無得參加哥哥嘅婚禮。哥哥Will同細佬手足情深,一早睇出Henry嘅擔憂,於是設計咗一個尋寶遊戲,正式邀請Henry擔任伴郎,Henry當場喜極而泣,大叫:「我願意,我愛你」,場面超溫馨感人!

據美國《霍士新聞》報道,24歲準新郎Will Claussen將會喺出年7月結婚,為咗邀請細佬Henry做伴郎,佢埋咗個玻璃樽係地下,仲叫Henry一齊玩呢個尋寶遊戲。Henry於是揸住個鏟掘咗一陣,掘到一個玻璃樽,樽入面有張字條,Will同佢一齊讀上面嘅字句:「Henry Joe,你已經是我最好的兄弟,也是我最好的朋友,所以你會否答應成為我的伴郎呢?」Henry先係驚訝,之後大聲應承哥哥,仲跳過去攬住Will講「我愛你」。負責將呢個感人時刻拍低、記錄落嚟嘅係Will嘅準新娘,呢段片之後上載到Will嘅社交平台,唔少網民都大呼感動,並送上祝福。

圖:FB@Will Claussen