如果對自己接受嘅教育模式有異議,會唔會出聲?又肯唔肯去改變呢?日本有個叫仁禮彩香嘅女仔就敢於踏出呢一步,提出新型教育提案想去改變日本教育對策。而23歲嘅佢宜家已經係兩間企業嘅老闆,真係令人羨慕妒忌恨~

宜家讀緊大學嘅仁禮彩香自細就對教育好有諗法,佢讀嘅幼稚園湘南International School風氣比較開放,遇到問題嘅時候老師唔會直接幫學生解決,而係會教佢哋自己思考點樣處理。不過彩香升上小學之後,咩事都由老師決定,令佢開始質疑現有教育制度。於是,佢直接搵咗以前幼稚園嘅園長傾,希望佢可以創立一間學風開放嘅小學,點知就俾佢願望成真,第二年就已經可以轉入呢間小學就讀。

去到初中,彩香更想探索改變日本教育嘅對策,興起咗創業嘅念頭。不過,彩香父母只係普通嘅上班族同家庭主婦,根本無足夠資金。於是佢搵咗佢嘅合氣道教練,提出新型教育嘅提案,並成功說服對方投資。只係到中四嘅年紀,彩香就成功收購母校湘南International School,又喺2016年成立第二家公司TimeLeap Academy。彩香話自己嘅新公司旨在提供教育計劃,培育中小學生開創自己人生嘅能力。彩香表示希望藉此改變日本教育,令學生更早適應社會。受新冠肺炎疫情影響,彩香公司嘅課程改為網上課程,學生嚟自全國各地,頗受好評。

圖:FB@Ayaka Nirei