香港大學「菁英聚港大計劃-HKU Academy for the Talented」同Microsoft連續三年合辦「STEM教育國際研討會」,每年均吸引嚟自唔同國家、地區嘅中學生參加。而上屆獲獎嘅團隊有嚟自本港同內地嘅中學生,佢哋憑住為改善盲人生活不便而設計嘅AI盲人手杖,奪得「最具創新性獎」,呢個發明更獲一間人工智能公司賞識,助發明開發成產品。

呢隊獲獎隊伍嘅7名學生,分別嚟自香港、內地、加拿大、印度、土耳其。佢哋嘅產品設計靈感源自其中一名土耳其嘅隊友,佢有一名視障人士朋友,生活上多有不便,而市場現有嘅盲人拐杖又無辦法完全滿足到佢哋嘅需要。為咗改善視障人士嘅生活質素,佢哋嘅產品將超聲波導航技術、平安鐘同AI私人助理嘅功能融入盲人拐杖中,為用家提供聲音導航、及時提醒用家前方障礙,仲會喺緊急情況下為用家提供及時協助。

AI盲人手杖嘅設計亦得到「願景人工智能有限公司」首席執行官蔣卓男嘅賞識,助佢哋將設計開發成產品。港大「菁英聚港大計劃」顧問委員會主席嚴志堅指,由2018年同微軟合辦研討會至今,今次係首度有學生參賽作品有機會推出市場。而今年6月至7月舉行嘅STEM教育國際研討會,因新冠肺炎疫情關係,需要移師網上舉行。

圖:香港大學