升讀大學本來係一件開心嘅事,不過對於內地部分學生嚟講,升讀大學就意味住要離開家鄉。江西一位女學生早前就獲湖南大學公共管理學院取錄,不過佢就非常擔心撫養佢長大嘅嫲嫲。

住喺江西都昌縣嘅劉媛,父母喺佢出世無幾耐就離異,爸爸患有精神病,喺佢讀高中嘅時候出院之後就不知去向,而媽媽改嫁之後就無再探過佢,於是由嫲嫲獨力承擔養育劉媛嘅重擔。

劉媛喺今年高考入面,考獲理科625分嘅優異成績,並且獲湖南大學公共管理學院取錄,但佢就非常擔心嫲嫲,佢原本諗住帶埋嫲嫲去長沙讀書,不過嫲嫲就唔想離開農村。

劉媛又提到,嫲嫲今年已經75歲,視力唔係咁好,仲有高血壓,實在唔放心要佢獨自留喺鄉下,當時報讀湖南大學,其中一個原因就係湖南鄰近江西,方便照顧嫲嫲。

湖南大學嘅工作人員早前將錄取通知書、愛心大禮包(書包、文具、生活用品等)同慰問金,送去劉媛屋企,並介紹咗學校喺人才培養、學生資助等政策,希望令佢可以消除顧慮,又表示已經同當地政府同民政部門協助安置劉媛嫲嫲。

原圖:中新網