野生動物本身就有能力喺野外搵食物,人類向佢哋餵食,有機會改變佢哋習性,甚至帶嚟危險。喺台灣玉山,上週六(22日)有一隻只有4個月大嘅野生獼猴,被遊客嘅汽車撞死。公園管理處接報之後到場處理,發現獼猴媽媽抱住小獼猴嘅屍體唔放,唔俾人靠近,其後連續幾日都係咁,又為屍體清潔、理毛,場面令人唏噓。

管理處表示,當地嘅猴子已經習慣被人類餵食,令佢哋習慣喺路邊等食物,一旦車速太快,好容易被路過嘅車輛撞死。管理處表示,當地食物豐富,猴子覓食容易,呼籲遊客唔好再丟食物餵佢哋,亦唔好帶食物落車,以免被猴子搶走,而路過嘅車輛亦應該減速慢駛,強調猴子唔識睇車過馬路,遊客應該尊重當地生態。

原圖:Facebook