正所謂人多力量大,英國近日呢單新聞就啱啱好說明呢個道理。英國一個約30歲嘅男泳客上星期四(20號)喺多塞特郡(Dorset)著名景點杜德爾門(Durdle Door)游水期間,被4.5米嘅巨浪捲走,無辦法游返岸。好彩,多得現場30幾個遊客築起人鏈,合力救返遇險泳客。

呢個泳客被困海中,無辦法返回岸上,唯有揮手向海灘上嘅遊客求救,其中有位男子發現佢嘅求救信號,曾嘗試落水救人,可惜不敵強風巨浪,同樣被困。其他遊客見狀,30幾人即刻手拖手組成一條長鏈,慢慢靠近被困泳客,最終成功將兩人拉返岸。

目睹事發經過嘅27歲女子富特(Emily Foote)話:「當二人獲救回岸時,現場隨即響起歡呼聲。」佢形容海浪非常強勁,成3米至4.5米高,仲要每5秒鐘就湧現一次。 另一目擊者沃倫(Jeanette Warren)就大讚被困海上嘅男子臨危不亂:「他做得非常好,沒有恐慌,否則要救援肯定難上加難。」

多塞特郡拉爾沃思區(Lulworth)海岸警衛隊就提醒大家,千祈唔好喺風高浪急嘅情況落水,特別係杜德爾門嘅暗流非常強勁,可以瞬間將人拉入水。

圖:FB@Lulworth Coastguard Rescue Team