解剖堂係醫學生了解人體構造不可或缺嘅一科,「大體老師」會以「身教」形式,幫助醫學生認識真實嘅人體結構。而「大體老師」喺「教書」之前,會先透過遺體防腐師做適當處理,港大醫學院早前就喺facebook專頁度為大家講解遺體防腐師嘅具體工作。

港大醫學院喺2012年成立咗「港大『大體老師』遺體捐贈計劃」之後,得到好多社會熱心人士支持捐贈遺體,令醫科、護理、中醫、甚至牙科嘅學生都可以受惠。港大嘅遺體防腐師Patrick自2008年起加入港大醫學院,除咗為大家準備好上課環境,更重要嘅係擔任遺體防腐師一職。當Patrick接收到遺體之後,先要核對「大體老師」嘅身份,然後會詳細檢查、消毒遺體。如果遺體有大型傷口嘅話,就要先縫合,再幫遺體擺放好適合解剖嘅姿勢,之後先正式開始做防腐。

Patrick會因應遺體嘅體質、身型、死因等因素決定用唔同嘅藥水或方法防腐,最後擺喺雪櫃儲存、預備教學,成個過程長達半年咁耐。而隨著技術同時代發展,Patrick仲會不時去學習新嘅遺體處理技術,佢笑言要成爲遺體防腐師,不單要對解剖學有興趣,還要願意持續學習,時刻增值自己,擁抱新挑戰。除咗培養新一代,Patrick表示自己嘅工作仲有另一重意義:「遺體本來只是生命完結後的皮囊,但透過我們的技術,我們可以替無私的捐贈者完成最後的遺願,讓他們變成『大體老師』,扶掖下一代醫護人員成材。」

圖:FB@HKU Medicine