創辦超過30年嘅香港公開大學(公大)表示,需要一個新名稱以反映公大目前狀況、重點同優勢,並促進未來嘅發展,正邀請公大成員同公眾人士提供名稱建議,集思廣益,提交俾「大學名稱評選委員會」審議同評選,啟動改名程序。有興趣嘅人士可以喺9月30日之前,經網上(https://retitling.ouhk.edu.hk/tc/#nomination)提供建議。

公大前身為「香港公開進修學院」,1989年由香港政府創辦,致力提供開放及遙距教育,以迎合當時社會教育需求,其後喺1997年正名為「香港公開大學」。為配合香港政府教育改革,公大分別喺2001年及2003年開辦全日制副學士及學士學位課程,但至今社會上有好多人以為公大只提供遙距教育,認為可能係公大早年喺遙距教育方面做得非常成功,亦有可能係「公開」兩字令人將公大歸類為以遙距方式提供公開教育嘅大學,呢啲誤解都為公大同畢業生發展造成唔少障礙。

公大喺2019年就大學重新命名深入檢討,喺2019年及2020年初同學生、校友、教職員等進行諮詢,大多數都支持重新命名,以反映大學特質同策略重點,促進未來發展。今年7月公大成立咗「大學名稱評選委員會」,專責統籌大學重新命名事宜,正邀請所有公大成員同公眾人士提出建議,所有收集到嘅建議會交俾委員會審議同評選,之後提交一個最合適嘅新名稱俾公大校董會審批,啟動程序呈交立法會修例。

原圖:香港公開大學