受影視、動漫作品影響,美人魚俾我哋嘅形象以女性為主,仲係體態優美嘅女性。不過河南省洛陽呢條「美人魚」,就同我哋想象中嘅美人魚形象大相徑庭,竟然係男美人魚,仲要係有小小肚腩嘅男美人魚,有網民坦言「童年幻想破滅了」。

近日網上流傳一段男美人魚表演片段,事發喺中赫海豚灣海洋公園,有名扮演美人魚嘅男工作人員喺水中表演期間,不時展示肌肉,又會偶然摸下自己個肚腩仔。動作雖然有啲誇張,但現場觀眾就頗受落,仲拎出手機不停拍攝。

男美人魚事後受訪指,當日扮演美人魚嘅女同事突然請假,佢本身係馴養員,識游泳,於是其他同事就慫恿佢著上美人魚裝,佢只係簡單練習一下,就臨時頂硬上演出。佢表示,初頭都好驚現場觀眾無辦法接受,甚至擔心嚇親小朋友,「沒想到效果卻挺好的,家長和小朋友都覺得搞笑,沒有別的意見。」

圖:微博@鳳凰周刊