有部分打工仔喺午飯時間,食完飯之後都會趴喺自己位小睡片刻,養足精神下晝繼續搏殺!不過喺唔同地方,工作文化都會有啲唔同,早前有一位喺越南從事建築設計嘅日本人,就喺Twitter分享越南人返工午睡嘅場面,佢仲話見到呢個情景以為嚟咗個戰時醫院添!

呢位日本人喺Twitter分享2張辦公室照片,見到相入面所有人都除晒鞋襪,瞓喺地上休息,有部分人仲自備咗張蓆墊喺地上,最離奇嘅就係全部人都將個頭捐晒喺檯底。佢其後解釋,其實呢個係越南人嘅午休習慣嚟,坦言見到呢個場面都感到好驚訝。

日本嘅職場環境比較高壓,唔少日本網民見到樓主嘅相都覺得好羨慕「午睡文化好正」、「哇我都好想可以咁做」、「午睡之後工作效率會更好」等等。

原圖:Twitter@taka3206