唔少人都鍾意養狗,不過要做一個負責任嘅狗主,需要抽時間陪愛犬玩、帶佢散步,對生活繁忙嘅香港人嚟講,就一啲都唔容易。喺德國,政府早前就宣布,計劃立法要求狗主每日要帶狗隻散步兩次、每次一個鐘,亦唔可以將狗隻困喺屋企全日或者長時間限制自由。法案細節仍未出台,預料明年先至會有後續程序,不過呢個法案而家就已經引嚟兩極嘅輿論反應。

德國聯邦政府嘅食品及農業部部長克洛克納(Julia Klöckner),早前公布《犬隻條款》嘅草擬內容,表示德國有大約20%家庭有養狗,全國大約有940萬寵物狗,係僅次於貓、德國第二大受歡迎寵物。克洛克納指出,現代都市生活節奏快,狗主同狗隻相處嘅時間被犧牲壓縮,推出嘅新法係以科學研究為依據,希望規範狗主,改善動物嘅福祉同權利。同時,新法亦會禁止狗主長時間以繩索等方式,限制狗隻移動,或者將狗困喺屋企一整天。

新法例引嚟持不同意見嘅網民熱烈討論,有支持嘅網民表示,本來就要多啲帶狗隻出去散步,但亦有狗主認為政府管太多、唔相信國民責任心。此外,執政黨基民盟黨內亦有質疑法例有唔同變數,難以執行,聯邦議員路德維希(Saskia Ludwig)就指出極端天氣下,夏天氣溫紀錄不斷創新高,喺攝氏32度天氣下,難以每日帶狗隻出去散步兩個鐘。有動物專家亦表示,狗隻散步嘅需求,要視乎唔同品種嘅身體及健康狀況嚟調整,難以一概而論。對於一啲老弱傷殘嘅狗主嚟講,更加係心有餘而力不足。

原圖:網易