喺瑞士一個小鎮發生咗一件奇怪事件,有可可粉竟然從天而降。事後發現原來係鎮上一間朱古力廠嘅冷卻系統出現故障,導致可可粉被吹散到朱古力廠附近區域。

衛報報道,著名朱古力品牌瑞士蓮(Lindt & Spruengli)早前承認呢件事故,公司位於奧爾滕(Olten)嘅朱古力廠,烘烤可可粒(cocoa nibs)廠區嘅冷卻通風系統出現小問題,當時咁啱吹強風,令粉末散播到周邊區域,導致出現可可粉從天而降嘅景象。

可可粒係製作朱古力嘅基礎原料,瑞士蓮表示可可粉對民眾同環境完全無害,對於有車輛被可可粉覆蓋,公司願意支付清潔費用,但目前為止都無人提出申請。現時朱古力廠運作正常,通風系統亦已經修復。

原圖:Twitter@olten