香港嘅運動員好特別,往往都有多重身份,要同時兼顧,本身就係一門學問。就好似港隊女乒乓球手麥子詠,由7、8歲開始接觸乒乓球呢項運動,15歲時成為全職運動員,代表香港參加過多項國際賽事。除咗一位全職運動員,佢仲喺香港中文大學讀緊學士課程,麥子詠接受訪問時表示,佢而家嘅目標就係「打好波、讀好書」,準備嚟緊嘅比賽之餘,亦希望日後成為一位體育老師,等更多小朋友可以接觸得到專業嘅乒乓球訓練。

DSE考試壓力較比賽更大

麥子詠好幸運,佢成為全職運動員之後,入讀咗林大輝中學,該校為佢同其他運動員提供彈性安排,逢星期一、三、五,以及星期六上晝上堂,等佢哋可以無後顧之憂咁兼顧訓練同學業。其後麥子詠應考中學文憑試(DSE),佢坦言:「準備DSE比起比賽壓力更大,情緒亦有好大起伏,但經過調節之後就變得簡單。」要兼顧學業同比賽,佢表示「就算好攰,都無諗過放棄」,當初佢讀高中就已經有一個好清晰目標,就係要入中大,最後亦如願考入中大。

中大校方亦給予運動員好多支援,現時佢係以兼職學生身份修讀健康與體育運動科學教育學士,每星期修讀不多於10個鐘嘅課程,有唔明白嘅地方亦都可以隨時問教授意見。全職學生修讀呢個課程一般需要5年,而佢就希望自己都可以6年內完成。佢表示:「修讀呢個課程,除咗對打波技術有幫助,亦可以喺隊中做一個榜樣,證明『讀書都好重要』,令有興趣成為全職運動員嘅人士,都可以放心做運動員,而佢哋嘅家長亦可以放心俾子女做運動員。」

要兼顧學業同比賽並唔容易,佢建議後輩要認清目標,「只要佢哋好想達成目標,無論係想完成高中課程,定係想入一間好嘅大學,最緊要清楚自己後面嘅路點行,目標清晰就咩都可以突破。」

運動令人更好地成長

被問到將來有咩目標,麥子詠就話現時目標都係「打好波、讀好書」,既要準備2021年嘅世界大學生運動會,爭取參加2022年嘅亞洲運動會,同時又要為將來嘅工作做準備,麥子詠表示,佢希望成為一位體育老師:「做體育老師可以令唔同學生都接觸到運動,透過運動令佢哋變得更自律、有規劃,更好地成長,希望可以令家庭條件無咁好嘅小朋友接觸乒乓球、享受乒乓球帶嚟嘅樂趣,以及接受專業嘅訓練。」佢解釋,現時請個乒乓球教練都要每小時500、600元,而且要有進步就需要單對單上課,同埋每星期都要打好多個鐘,未必個個家長都承擔得到。

香港特殊嘅環境,的確令好多有潛質嘅年輕運動員未能更進一步,但各方嘅協助,加上運動員本身嘅決心,就係佢哋繼續追夢嘅憑藉。

原圖:麥子詠​