自從欄王劉翔一再喺世界性跨欄賽事上,追平、超越咗世界紀錄之後證明咗跨欄呢個項目唔再係黑人嘅天下。近年亦有越來越多亞洲選手喺跨欄賽場上大放光芒,本港青年運動員王珞僖都係其中一位後起之秀,佢曾經喺2018青年奧運會上為香港奪得首面青年奧運會田徑獎牌,今日小編特別邀請咗王珞僖Addis同我哋分享下佢成為運動員嘅心路歷程。


機緣巧合  踏上跨欄之路

Addis成為跨欄運動員可以話係一個巧合。雖然Addis由小學開始已經鐘意做運動,好多類型嘅運動佢都有玩過,但就無話對特定一項運動有好大興趣。直至佢中三嗰年,學校因為唔夠跨欄運動員參加學界比賽,老師就問Addis想唔想試下練跨欄,亦都因為呢次契機,從此改變咗Addis往後嘅人生。Addis練咗2個月跨欄,佢唔單止好快掌握到跨欄嘅技巧,更加發現自己愛上咗跨欄,覺得自己好有動力去做好、想進步。而喺呢場學界賽入面,Addis雖然只係得到第五嘅成績,但對於佢嚟講已經係一種鼓舞,令佢更加想將跨欄由興趣變成自己嘅長處。


過分自信  險與青奧會擦肩而過 

由初學跨欄,到中四打破學界B Grade 100米欄紀錄,再到2018年青年奧運會奪得銅牌,Addis用咗3年唔夠嘅時間就有咁嘅成績實在難得,不過中途佢都曾經失手,仲差啲同青奧會失之交臂。當成功來得太快,Addis難免有啲驕傲自滿,就喺佢以為自己一定可以勝出2018青奧會選拔賽、拎到青奧會入場券嘅時候,佢喺賽場上失咗手,無緣參與青奧會。嗰陣佢好失落,完全無心機喺主辦場泰國周圍玩,更加唔想同人講嘢,連教練安慰鼓勵佢嘅說話都聽唔入耳。好彩,由於Addis喺之前嘅賽事表現唔錯,亞洲排名較高,世界田徑聯會寄咗封錄取信俾Addis,令佢破格獲得2018青奧會參賽資格。

失而復得嘅機會即刻振奮咗Addis,之後更努力訓練為青奧會做準備。不過,教練喺比賽前就話Addis,如果未準備好就不如退賽返香港。原來Addis雖然有參賽嘅體魄,但由於係第一次參加咁大型嘅盛事,難免緊張,所以心態上仲未ready。最後多得教練點醒佢:「青奧會一生人得一次機會」,先令Addis醍醐灌頂,狀態大勇,終於奪得獎牌。


青年奧運會賽場上受訪者提供


青奧會比賽後,Addis知道有獎牌攞之後開心到衝去看台攬住教練(受訪者提供


Addis最後喺青奧會奪得銅牌受訪者提供

運動絕對可以同學業並存

正當大家以為Addis攞獎之後會轉做職業運動員之際,Addis已經獲理工大學醫療化驗科學錄取,同時兼顧學業同跨欄。Addis話:「好多人覺得讀書唔叻先會去做運動員,但其實我識唔少人成績又叻運動又勁。」佢之所以入讀理大係想打破呢種觀念,證明俾大家睇學業同田徑係可以並存嘅。至於大學畢業之後嘅路向,Addis就話要視乎到時嘅田徑成績再決定係咪轉做職業運動員。

以前Addis覺得自己嘅身高喺跨欄項目上好蝕底,直至佢見到同樣身高180cm嘅牙買加跨欄選手Omar McLeod喺上屆奧運奪得冠軍,令佢重燃希望,相信只要訓練足夠,一樣可以創造奇跡。

圖:受訪者提供