香港旅遊發展局今日(19號)宣佈,由於新冠肺炎疫情發展不明朗,原訂喺今年11月舉行嘅「香港單車節」將會取消,而「香港美酒佳餚巡禮」將會首度移師網上舉行。

旅發局主席彭耀佳解釋,有見環球疫情持續反覆,為審慎起見,同時確保參加車手、工作人員、現場參觀人士嘅健康,旅發局決定取消今年嘅「香港單車節」,該活動已連續2年取消。

而今年嘅「香港美酒佳餚巡禮」,為咗平衡參展商、市民嘅健康同經濟發展,將改以網上形式舉行。今年巡禮會設計全新嘅一站式網上平台,網羅過百餐廳及酒商優惠,再加入網上品酒學堂及名廚烹飪班等,令市民同旅客可以唔受時間、地域、甚至社交距離限制,體驗世界級嘅美酒美食。商戶亦可以藉此推廣其產品,同時帶動周邊相關行業。屆時活動會延長至數星期,美酒及餐飲商戶亦會提供優惠,而早前已報名參展嘅商戶將可免費參與活動。

圖:旅發局