著過嘅污糟衫要掉落洗衣機洗是常識吧?但大家有無諗過,就算洗衣機洗完嘅衫都未必乾淨,因為洗衣機本身就係細菌滋生嘅溫床,用咗半年嘅洗衣機,其細菌含量隨時多過廁所馬桶!

據美國ABC News報道,美國亞利桑那大學(University of Arizona)微生物學教授Charles Gerba,檢測100部用過嘅洗衣機之後發現,60%帶有大腸桿菌群(Coliform Bacteria)、10%有大腸桿菌(E. coli),另外仲有沙門氏菌、金黃色葡萄球菌等。而呢啲細菌有機會喺洗衫嗰陣交叉感染:「如果只洗一堆內衣,水中將有約1億個大腸桿菌,它們可以被轉移到下一批衣物中。」Charles Gerba解釋指,由於洗衣機內有大量塑膠,為容納細菌嘅生物膜提供舒適嘅住所,而大腸桿菌更可以潛伏好長時間,以污染下一批衣物。

單靠洗衣液係無辦法完全清除衣物上嘅所有污垢同細菌,細菌更加會沾喺洗衣機內,所以最好用熱水或漂白水洗衫,將衣服晾喺陽光底下都可以殺菌。如果唔想洗完啲衫都仲被大堆細菌包圍,就要注意定期用梳打粉或洗衣機專用清洗劑清潔洗衣機喇。

圖:網上圖片