疫情停課期間,小朋友多咗時間留喺屋企,但無理由日日睇電視玩遊戲啩!家長可以好好運用繪本,令小朋友喺屋企學習更豐富好玩。SOWGOOD!正向品格教育館剛剛推出首本繪本作品《生日快樂》,館長張瑋珮表示:「想令小朋友喺屋企培養出正向品格,繪本可以扮演好重要嘅角色。」

唔少家長都擔心停課期間,會令小朋友學習停滯不前,但又唔希俾太多學習壓力佢哋,繪本内容以圖畫為主,文字為輔,對小朋友嚟講,係色彩繽紛嘅圖書,係一個輕鬆、有趣嘅渠道,令小朋友學習唔同嘅知識。張瑋珮指出:「有啲概念比較抽象,好難同小朋友解釋,但繪本以圖畫同故事形式帶出,就可以令小朋友易於理解。」 

市面上有各種嘅繪本,有啲家長都唔知點樣選擇。張瑋珮認為,一方面要圖畫豐富,每次望落去有新發現,更重要係挑選小朋友喜歡嘅繪本,只要佢哋喜歡,自然愛不釋手,閱讀興趣就會更加高。「一本好嘅繪本,除了圖畫吸引外,文字唔需要太多,甚至未必有結局,可以俾小朋友有更多想像空間。」當每次翻看繪本,每次都有新發現,新嘅幻想,新嘅體會,就係一本好繪本。

另外,張瑋珮指出,伴讀係家長同小朋友嘅最佳橋樑,一路讀可以一路引導小朋友觀察,培養佢哋嘅觀察力。張瑋瑱仲提供咗以下三個小貼士: 

1. 孩子主導 

一般伴讀都係由家長朗讀,小朋友聽故事,朗讀期間可以多啲問小朋友問題,例如:猜想下一個情節?主角將會發生什麼事情?刺激小朋友嘅創造力,又可以增加投入感。張又表示:「當小朋友大啲,可以由小朋友讀故事,唔使在意能否認字,只要有圖畫,佢哋就能夠編出有趣嘅對白同故事,培養出創造力。」另外,咁樣亦可以培養小朋友分享自己嘅睇法,對佢哋嘅情緒都會有正面影響。 

2. 連結經驗 

家長可因應故事情節引導小朋友聯想日常生活經驗,甚至代入角色,令佢哋更容易掌握抽象嘅的概念,或鞏固一啲已有嘅經驗,從而豐富佢哋嘅認知。

3.  延伸活動 

繪本能夠提供想像空間,父母可以同小朋友就着故事自行創作情節同結局,或抽取故事角色,創作另一個故事。現時小朋友留喺屋企時間較多,家長更可以抽取故事中嘅元素,引導小朋友製作手工和烹飪等。

圖:聖雅各福群會


SOWGOOD!正向品格教育館館長張瑋珮建議在居家抗疫活動中增加繪本元素。


小一學生馬珺琦和李柏樂閱讀《生日快樂》時十分投入,更一起討論情節。