上個禮拜大學聯招(JUPAS)放榜,唔知同學仔入唔入到心儀嘅院校同學科呢?大學同中學可以話係兩個唔同嘅世界,嚟緊踏入人生新階段嘅同學仔,記得要做好準備、調節心態,迎接大學嘅新生活喇!最近就有網民喺Facebook專頁「CUHK Secrets」發文,題為「五個入U後要有嘅習慣」,幫助新生適應新環境。帖文入面提到嘅習慣,其實唔止中大,一樣適用於唔同院校,就等小編整理下同大家分享啦!

一、Check Email。讀中學嘅時候,學校會派通告通知學生同家長,不過上到大學就要習慣每日check email,上堂、功課、測考等等嘅安排都係透過email通知學生,如果自己無check email嘅習慣,就好容易錯過咗重要消息㗎喇!

二、及早plan定行程。以前讀中學有固定嘅返學、放學時間,之不過上到大學,同學之間修讀嘅科目同課程都可能有唔同,要自己留意每日需要幾點出門返到大學,亦有機會出現俗稱「天地堂」即係一朝一晚嘅課堂,就要自己安排好點樣善用時間。再加上有啲人要「上莊」、返part time等等,就要習慣plan好行程,而唔係到時先算。

三、自己搵答案。上到大學,踏入人生新階段,遇到有咩困難、唔明嘅地方,應該先嘗試自己搵答案,而唔係一諗起就問。

四、留意唔同專頁。除咗check email之外,唔同社交平台嘅專頁都係重要得悉資訊嘅地方,及早follow有你著數!

五、多啲同唔同社交圈子交流。喺大學好難會有同一班朋友可以由頭到尾陪足全日,大家有機會讀唔同嘅科目、住唔同嘅hall,亦有唔同嘅個人生活,多啲同唔同圈子嘅人相處、保持聯絡,對校園生活都會有幫助。

原圖:RTHK