泰國嘅新冠肺炎疫情稍緩,學生們7月已經開始復課,有媒體近日走訪泰國學校了解防疫措施,見到學生無論上堂、小息定放飯,都幾乎喺重重防護罩入面。

綜合外媒報道,曼谷一間小學7月復課之後,約有250名學生重返校園。校方增添咗一款由膠管同透明膠片砌成嘅方形帳篷,每個學生獨立一個,無論上堂、玩都喺入面,雖然比較安全,但就令人感覺好似坐緊監咁。亦有啲學校加設透明屏障,隔開相鄰嘅同學仔,打個招呼都要隔住塊膠片。有學校就提供膠片同紙箱砌成三面隔板放喺檯面,用嚟阻隔飛沫傳播,學生喺入面上堂、食嘢就好似去咗自修室咁。

好多泰國學校做足防疫措施,除咗提供基本嘅酒精搓手液、加裝洗手設備外,校門附近仲設有鞋底消毒器,甚至為每位學生提供面罩、眼罩組合。

圖:新華網、網上圖片