近年嚟,越來越多年輕夫婦婚後都想過下二人世界唔生BB住,有人甚至決定唔生。不過原來生BB都唔係兩公婆決定就得,事關身邊總會有啲姨媽姑姐不斷催生B,有港女不堪被擾,放出大招一招KO班親戚,自此耳根清淨。

Facebook專頁「辦公室日報」發文指,有個女同事上年年頭結婚,已經同老公有共識要過下二人世界,唔急住生BB,後來社會一連串動盪影響之下,更加延遲生B計劃,點知成班長輩親戚係咁逼佢哋生仔。最過分嘅係,有親戚仲同呢個女同事講:「女人唔生仔,點算係稱職嘅老婆呀?」又話佢哋「養狗會對BB唔好」,要佢哋棄養隻狗,女同事覺得「個肚係我嘅,人生係我嘅,幾時輪到佢指指點點呀?」

之後女同事不勝其煩,決定出招反擊,就係同親戚講佢決定要生BB,不過由於間屋得一間房,生完BB根本唔夠空間,所以兩公婆決定要換間大啲嘅屋,但就唔夠錢,希望親戚們可以借啲錢俾佢哋先,之後再分期慢慢還。呢招一出,成班親戚好似突然唔識字咁,一見到要借錢就無再覆message。女同事之後再逐個打去約班親戚飲茶,話想出嚟傾下借錢買樓啲嘢,最後個個親戚都話唔得閒,自此唔單止無再煩佢生BB,連普通交流都無。呢個post一出,唔少網民拍手叫好,仲引嚟一眾網民共鳴,紛紛分享自己被人催拍拖、結婚、生仔嘅經歷。

圖:網上圖片