病咗嘅人學習總會比其他人困難,內地瀋陽一個18歲少年王唯佳患有罕見嘅「龐貝氏症」,要靠呼吸機續命,但佢就從來無放棄過學習,終於喺今年內地高考取得好成績。王唯佳回鄉後更開辦免費補習班義教村內貧困兒童,將所學分享出去。

王唯佳自12歲就確診患上罕見重病龐貝氏症,佢嘅肌肉無力、脊椎側彎,連行步路都好艱難,更要靠呼吸機嚟續命。亦因此,王唯佳喺學習路上困難重重,但佢深信知識可改變命運,往往比別人花多一倍時間讀書,最終喺今年內地高考考到662分嘅好成績。王唯佳嘅英文老師兼教學主任丁君華對佢讚口不絕,話佢雖然身體殘障,但就樂觀開朗,仲練得一手好字。

王唯佳感恩喺學習路上得到好多人幫助,為咗賺藥費咩辛苦工都做嘅爸爸、陪讀5年嘅媽媽、扶持佢嘅同學、捐款俾佢嘅老師等等。所以,王唯佳希望將知識回饋俾師弟師妹,佢將一個倉庫改建成臨時教室,每日堅持為同村嘅小朋友補習。王媽媽非常支持囝囝嘅決定:「大家把他當榜樣,這是他應該做的。」

圖:網上圖片