新冠肺炎肆虐全球,打擊各行各業嘅生計,馬戲團亦因疫情關係暫停公演。無收入點樣養得起一眾馬戲團動物?德國慕尼黑嘅Krone馬戲團就特發奇想,靠賣獅子便便嚟改善動物嘅生活條件,宜家已經賣出2000罐,究竟獅子嘅便便有咩用?

據馬戲團所說,獅子排泄物係居家良伴,可防止其他討人厭嘅野生動物靠近自己屋企,顧客同馴獅師Martin Lacey都話佢好有效,Martin表示:「有人告訴我它(獅子的糞便)可以避免野貓進到花園,我們還得知它可以驅離會吃車子電纜的動物。」呢啲獅子便便每罐售價5歐元(約港幣46蚊),為馬戲團帶嚟一筆意外之財,而收入嘅一部分亦將捐贈俾改善圈養動物嘅慈善機構。而馬戲團亦唔擔心「貨源」會斷,因為佢哋養咗多達26隻獅子同老虎。

圖:中新網