相信唔少人都試過食魚鯁骨,不過就未必個個都會去醫院喇,但原來好危險㗎!早前廣州有一名45歲姓陳嘅男子,飲魚湯嘅時候唔小心吞埋條魚骨鯁親,佢憂慮疫情期間去醫院會有受感染風險,於是延誤求醫,最終吐血身亡。

根據內地傳媒報道,陳男喺上月30日放工返屋企,飲咗太太煲嘅魚湯之後,喉嚨感到刺痛,自己估計係鯁到魚骨,於是就嘗試吞飯、飲醋等等方法,但都係唔得。當時太太就叫佢去醫院檢查,但佢因為憂慮疫情有風險就唔肯去,直至3日之後,佢突然開始大量吐血,先至由家人陪同去醫院求醫。醫生見佢不停吐血,就為佢插管、人工呼吸同輸血,但情況都係無起色,延至8月3日晚離世。

醫生解釋,經檢查後發覺有1條4厘米長嘅魚骨卡住喺陳男食道嘅上段,並且已經刺穿食道同胸主動脈,因此大量吐血。醫生提醒,鯁到魚骨之後千祈唔好嘗試吞飯、飲醋呢類方法,一定要盡快到醫院求醫。

原圖:新浪