有興趣成為物理治療師、職業治療師嘅同學仔,機會嚟喇!理工大學將於下個學年起,連續3年開辦物理治療同職業治療兩項碩士課程,只要學生喺入學前與非政府社福機構簽訂畢業後連續服務3年嘅承諾書,更可獲資助全數64萬元學費添。下學年嘅課程由今日(12日)起接受申請,8月26日截止,明年1月入學,有興趣嘅同學仔就唔好錯過喇!

社會福利署由2012年起資助理大隔年開物理治療同職業治療兩項碩士課程,社署署長梁松泰表示,香港面對人口老化,對復康護理療服務嘅需求越來越大,社署過去4屆資助咗超過250人投身行業,而未來3年理大繼續開辦課程,資助嘅總名額將會超過290個。理大康復治療科學講座教授及系主任曾永康就話,根據食衞局2017年一份報告顯示,去到2030年香港將會欠缺約190名職業治療師同900名物理治療師,而現時每年只有100多位學士課程畢業生,難以滿足未來嘅需求,而碩士課程只需要2年就可以獲取專業資格,相信會吸引到有興趣入行嘅人士報讀。

理大嘅職業治療學碩士同物理治療學碩士課程,都係2年全日制課程,分為6個學期,包括2個暑期學期,以及喺醫院及社福機構完成至少1000小時實習,畢業後將會取得註冊職業治療師或物理治療師資格。

下學年嘅課程會喺明年1月開學,名額分別為48人,由今日(12日)開始接受報名、8月26日截止。課程適合持有學士學位並已完成人體生理學及人體解剖學各3個學分嘅人士報名,收生時會採計分制同面試,曾修讀心理學、營養學或人體運動學等醫護相關課程者將獲優先考慮,而面試就會睇下申請者對投身復康行業嘅熱誠。

原圖:RTHK