新冠肺炎疫情持續,有幾間老人院爆發疫情,多人感染,甚至死亡。69歲藝人邵音音近日聯同義工,透過香港盲人輔導會,捐出一萬個口罩俾盲人安老院嘅長者同其他有需要人士,佢更憶述當年梅艷芳梅姐叫佢哋探訪沙士確診者家庭嘅往事。

邵音音喺社交平台分享一封由香港盲人輔導會俾佢嘅感謝信,指今次捐出嘅口罩主要分發俾幾間盲人安老院同機構,更留言話:「戰勝疫症,早日回歸正常生活。祝大家身體健康!」

邵音音憶述當年沙士爆發嗰陣亦曾到各區派口罩,當時落大雨,派完口罩後,連車都要換第二架。佢指當時梅姐叫藝人一定要探訪「中招」家庭,俾人知「演藝人協會」團結,佢哋探訪嗰陣無戴口罩,因為驚傷害患者嘅心靈,不過宜家諗返起都覺得驚心。

圖:IG@ladyumyum