通常啲選美比賽,得獎嘅都係長髮飄飄、有氣質嘅靚女,不過越南呢位選美冠軍Tran Thuy Tien就打破以往大家對選美嘅認知,以光頭形象示人,但自信依然。原來Tran咁做係為咗鼓勵癌症病人勇敢對抗病魔!Tran年紀輕輕就患上乳腺癌二期,需要一邊接受治療一邊參選,但佢無放棄,最後成功奪冠,更獲得「勵志小姐」嘅稱號。

19歲嘅Tran生於河內一個普通家庭,高中畢業後以優異成績考上河內市對外貿易大學商務英語系,點知就喺入學無幾耐,佢被確診患上乳腺癌二期。咁後生就患病對佢打擊好大,但佢認為父母一定比自己更難過,於是佢鼓勵自己重新振作,仲報名參加咗「2019河內市對外貿易大學優雅小姐」選美比賽。雖然要一邊治療一邊受訓,但Tran喺準備比賽嘅過程中,可以忘記病痛。

比賽嗰陣,Tran大方喺舞台上除低假髮,展現自信、灑脫嘅一面,台下所有觀眾、同學同老師都為佢鼓掌叫好。最終Tran如願奪得后冠,仲獲得「勵志小姐」嘅稱號。佢嘅故事亦被多間越南媒體報道,引發網友嘅熱烈討論。

圖:kenh14.vn