早排有新聞話,有人用完酒精搓手液搓手後開爐煮食,隨即搶火燒傷,但估唔到原來搽潤膚霜都有機會搶火!英國倫敦最近就有一位83歲老婦伊馮娜(Yvonne Webb),搽完潤膚霜之後,懷疑喺煤氣爐附近點蠟燭,意外搶火變成「火人」,佢衝出家門求救,鄰居上前協助,但送院搶救不治。

伊馮娜個仔韋布(Ben Webb)表示,媽媽患有早期認知障礙症,佢搽潤膚霜係為咗舒緩濕疹同牛皮癬,但點知點蠟燭令到身體著火。韋布表示,一收到電話就即刻趕去媽媽屋企,發覺佢傷勢好嚴重,無幾耐被送上救護車,而韋布亦陪住佢去到醫院,而呢次就係韋布同媽媽最後一次傾計。

韋布之後發起活動,提醒民眾關注潤膚霜嘅潛在危險,又要求廠商喺安全標籤上列明要注要嘅事項,佢坦言媽媽有認知障礙,肯定唔明潤膚霜嘅危險,而佢自己事前亦都完全唔知。佢指出小朋友嚟講,媽媽係好稱職嘅嫲嫲,難以想像媽媽會以咁痛苦嘅方式離世。

倫敦消防隊指出,潤膚霜普遍含有石蠟(Paraffin)、石油或天然油脂等易燃物質,而且一旦潤膚霜滴落衣物變乾,就會變得容易燃燒。倫敦消防隊提醒,搽潤膚霜嘅時候應避免點蠟燭或者食煙,尤其是行動不便嘅人士,因為佢哋較容易整跌嘢,增加火種擔到易燃物質嘅風險。

原圖:London Fire Brigade