女仔食少餐減肥大家就聽得多,但珠海一個12歲嘅女仔周美婷就反其道而行,一日食6餐努力增磅。原來佢爸爸患有血癌,急需接受骨髓移植續命,周美婷嘅骨髓雖然同爸爸匹配,但佢嘅體型太瘦弱,唔符合體重標準。周美婷為咗捐骨髓救爸爸,搏命增重最終成功救咗爸爸一命。

周美婷嘅爸爸患上急性髓系白血病(血癌),先後做咗4次血液化療仍未康復,醫生就話需要進行骨髓移植手術。周美婷身高160cm,體重只有40kg,而骨髓移植手術要求提供者體重至少達45kg,因為醫生話身型太瘦弱,容易喺手術過程入面昏厥,建議佢增重。為咗救爸爸,周美婷一日食5餐,瞓覺前仲要食多碗麵,「有時候真的吃到吐,吃不下了。但一想到爸爸的病,我就希望自己胖得再快一點。」

就咁一日食6餐,周美婷終於如願增重5kg,符合捐骨髓要求,係醫院至今年紀最細嘅幹細胞捐獻者。血液內科副主任徐景勃表示,骨髓採集手術即使用咗麻醉藥,疼痛同不適感仍會伴隨住整個手術,但小小年紀嘅周美婷就非常堅強,手術過程中都無講一句說話,醫生表示「不少成年人都做不到」。最終,周美婷爸爸成功完成咗骨髓移植手術,宜家已經恢復健康。

圖:網上圖片