疫情期間唔少人都叫多咗外賣,亦都用多咗一次性塑膠餐盒、餐具,對環境嘅傷害大增。香港科技大學有4位來自印度嘅學生,研發咗一種以全麥麵粉製成嘅可食用餐具「Edibleware」,可以用嚟代替即棄餐具,能夠喺熱湯入面維持原狀30分鐘,食完個餐仲可以食埋餐具落肚,就算唔食亦可以被自然分解,夠曬環保呀!

幾位來自科大工學院同商學院嘅本科生,組成「Planeteers」,佢哋喺網上自學烘焙技術,經多番嘗試終於研發硬度適中、又可以喺烘焗時維持形狀嘅「餐具食譜」。只要將麵團切成唔同形狀,再放入烤爐焗1個鐘就完成可食用餐具,餐具嘅味道較淡,唔會影響食物嘅味道。佢哋親身試用過可食用餐具食拉麵,用起來同普通餐具差唔多,仲可以喺湯麵入面維持原狀30分鐘添。

Planeteers憑呢個發明係今年科大同信和集團合辦嘅「100萬獎金創業計劃大賽」中,贏得「環境與可持續發展」組別嘅「重點領域獎」,佢哋宜家亦正計劃尋找餅店合作推出試驗計劃。

圖:科大網頁