智能手機普及,自己一個去旅行都非常方便,不過早前有一位奧地利遊客,去到意大利一個博物館遊覽嘅時候,掛住同藝術品影相,唔小心整爛咗件藝術品,但好彩好大機會可以修復到。而呢位遊客事後知道自己闖禍之後,亦表示歉意。

事件發生喺意大利波薩尼奧嘅安東尼奧·卡諾瓦博物館(Museo Gypsotheca Antonio Canova),一位奧地利遊客同一個19世紀大理石雕塑「Pauline Bonaparte as Venus Victrix」嘅石膏模型影相嘅時候,整爛咗模型嘅兩隻腳趾。

館方8月1日喺佢哋嘅Facebook專頁交代事件,指呢名遊客當時迅速離開,未有即時同工作人員交代事件,而警衛喺事發後5分鐘發現模型腳趾損毀,並從監視錄像查出事發經過,館方又喺帖文上呼籲,要尊重博物館保存嘅藝術品、物品。

博物館館長Moira Mascotto表示,博物館正計劃為呢件藝術品進行修復,由於博物館保存咗破碎部分,所以好大機會可以成功復原。後來,嗰名「不顧而去」嘅遊客亦寫信向博物館「自首」,表示當時無意識到造成損壞,事後並無「潛逃」,而係繼續遊覽博物館同留喺意大利,對此表示歉意。

原圖:FB@Museo Gypsotheca Antonio Canova、YouTube@La Repubblica