日本名古屋一間汽車零件公司「日本特殊陶業」,正開發緊一套以顏色溝通嘅系統,等員工可以唔同顏色表達自己嘅心情,從而促進員工之間嘅溝通,提升職場氛圍、減少言語上嘅誤會。

日本特殊陶業正開發緊一套以顏色溝通嘅系統,並將系統命名為「早安顏色」,系統內有21種顏色,員工每日就可以用手機或者電腦選擇符合自己當日心情嘅顏色,並根據自己感覺良好與否調整百分比。

累積多次紀錄之後,系統就會結合色彩療法同色彩分析,向員工提供心理分析,等員工知道自己近期嘅心理狀態。另外團隊亦可以透過系統,了解同事嘅心情。開發者表示,平時用言語或者其他形象化嘅方式表達想法同心情,有機會因為要顧及顏面或職場關係而壓抑自己,導致誤會,利用顏色表達想法同心情,就可以成為人與人之間嘅緩衝。

原圖:日本特殊陶業(取自朝日新聞)