第三波新冠肺炎疫情持續,自7月以來,每日都出現唔少本地感染個案,來自各區、各行各業。特首林鄭月娥今日(7日)下午宣布,將會推行非強制性全民免費核酸檢測,最快兩週後實施。至於以咩方式採集樣本,林鄭月娥表示暫時未有定案,但進行病毒檢測時,會按照5項原則,包括以短時間內提供服務、保持社交距離、必需便民同電子化、流程安全有序,以及保障個人私隱。

林鄭月娥解釋,現時部分群組嘅社區檢測,包括安老院舍同的士司機,都係用咽喉拭子,要登記時間到一個地方由實驗室人員安排採樣,交通同物流等因素導致成本較高,如果喺社區中心有人群排隊,又有感染風險,所以現時仍然研究緊採用咩方案。

另外,政府亦正改裝中山紀念公園體育館作「火眼實驗房」,加強檢測能力。林鄭月娥又提到,當局已經向中央政府提出要求,包括喺亞洲博覽館額外建設多1000個負壓床位,佢形容係「港版方艙醫院」,此外又會喺亞洲博覽館旁興建臨時醫院「港版火神山醫院」,以應對日後突如其來嘅疫情。

原圖:RTHK