今年嘅大學聯招將會喺下星期四(13號)放榜,不過殘疾申請人特別考慮嘅結果已經喺尋日(6號)公布,有6間本地大學已經取錄9名有特殊學習需要嘅應屆文憑試考生。今年由道教聯合會鄧顯紀念中學畢業、下半身癱瘓嘅邱梓霖,就係其中一位。佢以最佳五科25分嘅成績如願入讀科技大學理學士(數學與經濟學),科大學生輔導中心專責小隊將會為佢設計個別支援安排。

邱梓霖小學嗰陣係游泳健將,曾有「北區小飛魚」之稱,只可惜7年前嘅一次意外令佢受傷,導致下半身癱瘓,連執筆都有困難。不過,佢並無因此放棄,反而憑住毅力克服學習困難,喺今屆文憑試考獲佳績,其中數學同經濟科更分別奪得5**同5*添,最後成功獲第一志願嘅科大理學士(數學與經濟學)取錄,得償所願。

校長劉志遠指,邱梓霖喺結果公布前夕心情緊張,徹夜難眠,得悉結果後更希望入住宿舍,享受大學生活。學校嘅社工同特教統籌主任已經告知科大,邱梓霖嘅情況同需要,方便研究具體嘅支援安排,以協助佢融入、享受大學生活。劉校長見證住邱梓霖嘅成長,覺得相當感恩:「由當初醫生說沒有希望,到他自己坐起身寫完一份考卷,在文憑試考獲不俗成績,都是他憑個人能力爭取得來。」

圖:網上圖片