唔知大家記唔記得自己3歲嗰陣係度做緊乜?英國一個3歲嘅小朋友Lexi,為咗幫患癌嘅媽媽籌款治療,自發每日踩單車嚟籌募媽媽嘅醫藥費,非常懂事!而媽媽Lois亦為Lexi感到自豪,仲話Lexi係佢一直堅持落去嘅原因。

21歲嘅單親媽媽Lois喺2年前確診患上罕見嘅癌症神經母細胞瘤(Neuroblastoma),佢曾擔心自己嘅病情令佢無辦法照顧囡囡Lexi,好彩多得當地慈善機構CLIC Sargent幫助,佢可以有錢去做治療,更獲安排入住距離醫院好近嘅臨時住宿,以方便佢往返,減少舟居勞頓。囡囡Lexi為咗答謝CLIC Sargent嘅幫助,同埋繼續幫媽媽籌集醫藥費,Lexi決定學佢堂兄咁,用踩單車嚟籌款,仲話要踩2000英里(約3218公里)。

一個3歲小朋友要踩2000英里,幾乎係一個不可能完成嘅任務。於是,佢哋決定一開始先將長度定喺32英里(約51.4公里),呢個長度嘅路程係Lois往返倫敦接受治療嘅距離。自此以後,Lexi就開始每日踩1英里單車,為媽媽嘅病籌款,佢更加樂在其中,每日都會問自己籌到幾多錢。Lois話:「我為她願意幫助一個拯救我的慈善機構而感到自豪。她擁有正確的價值觀,並且能夠利用它去幫助其他人,有她成為我的女兒我真的很幸運。」

圖:FB@CLIC Sargent