新冠肺炎重創全球經濟,但仍然有唔少企業努力生存,絕處逢生。日本千葉縣一間鐵路公司因為疫情關係失去近9成半嘅營業額,瀕臨破產邊緣。老闆為咗挽救公司生意,不惜使出3大絕招急救,包括:開Youtube頻道、拍片搞鬼宣傳、賣女車長周邊同鐵路石頭,可謂創意無限。

 為咗幫公司起死回生,公司老闆開咗個名為「銚子電氣鐵道 超艱辛頻道」(Youtube@0ffical銚電ism)嘅Youtube頻道,用嚟擺自家製宣傳短片。短片由老闆同員工親身上陣,又幫短片加入特效,又高質又搞笑。佢哋更花咗1年又4個月籌備、2000萬円(約140萬港幣)拍咗套電影《電車を止めるな》(不要煞停電車),預計今個月尾公開,老闆喺入面會扮鬼扮馬惡搞其他知名節目例如《世界奇妙物語》等,相當有心思。

 拍片不突止,公司入面有位叫做袖山里穗嘅女車長,因為曾被各大傳媒採訪過,宜家變成公司嘅代表偶像,公司專門推出袖山里穗嘅周邊好似筆記簿、車票等商品發售。賣周邊都唔出奇,公司更推出好多古靈精怪嘅商品喺網上發售,連鐵路上嘅石頭都包裝成罐頭出售,石頭罐頭更加係佢哋嘅人氣商品添!

 圖:銚子電氣鐵道網頁