黎巴嫩首都貝魯特嘅港口區域,日前發生爆炸,造成過百人死亡、幾千人受傷,事件引起各國關注。喺爆炸發生嘅時候,當地有一名孕婦咁啱入咗產房分娩,令到場面非常混亂,但佢仍然戰勝恐懼,成功誕下男嬰。

英國廣播公司(BBC)報道,當時一名孕婦Emmanuelle喺位於貝魯特嘅聖喬治醫院準備分娩,而佢嘅丈夫Edmond Khnaisser就表示,爆炸發生時佢聽到一聲巨響,天花隨即塌咗落嚟,而且周圍都係玻璃碎。Edmond表示,當時最擔心太太同孩子嘅安全,驚佢哋會受傷,於是就協助醫護人員將病床搬出。而太太Emmanuelle當時亦都被爆炸嚇得好驚,但仍然好努力咁壓抑自己嘅恐懼,喺缺乏藥物嘅情況下,忍痛分娩,最終喺爆炸發生後大約個半鐘誕下男嬰George,母子平安。

原圖:Edmond Khnaisser