新冠肺炎疫情持續,口罩變成人人出門必備之物,雖然近嚟口罩供應穩定,價格亦有回落,但每日用一個幾蚊嘅口罩對唔少低收入家庭嚟講依然吃力,尤其係老人家,佢哋往往因為唔想浪費而將一個口罩用完又用。有位美孚街坊日前就見到有個伯伯不斷用扣針嘗試將斷咗嘅口罩繩扣返,佢覺得好心酸,轉頭買咗2盒口罩俾伯伯,更忍唔住喊咗出嚟。

呢位美孚街坊喺facebook群組「Mei Foo美孚」發文表示,經過美孚廣場嗰陣,發現有個伯伯坐喺度不斷用扣針扣一個爛咗嘅口罩,於是送咗一個新口罩俾佢。呢位街坊之後又去咗附近嘅便利店買咗2盒口罩,諗住送俾伯伯。點知返轉頭,見到伯伯依然仲喺度努力扣返條口罩繩,令佢覺得好心痛:「我叫佢唔好要個舊啦....好心酸!我走的時候喊咗出來。」

唔少網民大讚呢位街坊做得好,亦有人留言分享自己都遇過類似嘅事。有網民亦希望更多人有同理心,多啲留意身邊有需要嘅人,幫到就幫,大家平安度過疫情。

圖:文匯報,網上圖片