新冠肺炎肆虐全球,口罩已經變成人人出門嘅必需品,唔少國家亦紛紛發明推出各式用途嘅口罩。日本公司Donut Robotics近日就推出一款「c-Face」口罩,唔單止可以將語音轉換成文字訊息、放大佩戴者嘅音量,仲可以將日文翻譯成其他八種語言,認真多功能。

Donut Robotics公司執行長小野大介指,「c-Face」口罩由白色塑膠同矽氧樹脂製成,有嵌入式麥克風,可透過藍牙連接到佩戴者嘅智能手機。佩戴者需要額外下載APP,然後系統可以將佩戴者講出嚟嘅日文翻譯成中文、英文、韓文、越南文、印尼文、泰文、西班牙文同法文。小野大介話:「許多情況下我們仍需親自見面,在這新常態中,口罩和App非常有用」。首批5000到1萬個「c-Face」口罩預計今年12月會喺日本上市,每塊約40至50美金(約港幣310至387蚊),最快要到出年4月先會向海外擴張。

不過,小野大介就解釋,呢款「c-Face」口罩十分注重透氣,所以並唔能夠防護新冠病毒,但可以戴喺標準口罩出面。

圖:Donut Robotics