新冠肺炎疫情反復,全港學生短期復課之後又繼續停課,導致教學進度受阻,好多家長又要返工,難以兼顧子女嘅學業,令學生嘅學習進度受阻,而基層家庭嘅情況就更嚴重。早前由恒生銀行支持、聖雅各福群會主辦嘅「友伴童恒」學童支援計劃,決定將計劃延長服務至今年12月,以提供更多支援俾基層家庭。

 「友伴童恒」計劃早喺今年6月展開,聖雅各福群會同7間社會服務機構、14間小學合作,為基層家庭提供託管服務,並為基層學生提供功課輔導、心理情緒支援、網上學習系統服務,預計約有3500名基層學生或家庭受惠。計劃除咗幫助基層家庭,舒緩家長照顧子女在家學習嘅負擔、幫助基層學生解決學習疑難之外,更透過一站式「I am…」網上青年職學平台招募有意投身教育同社福界嘅年輕人,增聘超過350名導師,為佢哋提供工作機會。對於呢次計劃能夠成功展開,聖雅各福群會總幹事李玉芝好感謝恒生銀行嘅慷慨捐贈,以及恒生義工隊嘅積極參與,佢表示:「是次『友伴童恒』學童支援計劃,結合來自社會服務機構、商界、學校及導師的力量,各界同心協助學生在復課及暑假期間應付學習需要。」

圖:「友伴童恒」參與福社機構提供