現年16歲嘅柬埔寨少年沙利,2018年年底喺一段短片入面,流利咁以8國15種語言向遊客推銷紀念品,因而爆紅、備受關注,有組織熱心資助佢讀書升學。去年5月,沙利就嚟到中國浙江省諸暨市嘅海亮外國語學校讀書,開始佢嘅求學生活,早前佢接受內地傳媒訪問,表示好鍾意文化交流,好珍惜呢個改變命運嘅機會,佢會好好把握。

沙利識15種語言,當中包括英語、法語、西班牙語、意大利文、普通話同粵語等等,而佢細佬亦識得11種語言。佢哋因為生活貧窮,為咗生活,佢哋朝早讀書,下晝就會去遊客區賣紀念品,所有語言都係同遊客溝通嘅時候學返嚟。

沙利喺節目上分享佢嘅學校生活同經歷,包括第一次食餃子、寫毛筆字、剪紙、耍太極等等,佢表示對中國文化感到好奇,而自己最鍾意就係中文。佢仲話好珍惜呢個機會改變命運,希望日後可以去北京讀大學,從事旅遊業、做導遊,利用自己嘅知識同語言能力同更多人進行文化交流。

原圖:新華社