早前宣布血癌復發嘅香港男子沙灘排球代表劉梓浩,週日(2日)喺Facebook發起眾籌,希望為自己籌措醫藥費,目標係60萬元,結果喺一日之後、週一(3日)晚上,佢就再喺Facebook發文,表示已經超額籌得250萬元,宣布暫停接收捐款。劉梓浩喺帖文感謝各位有心人捐款,令佢深深體會到愛,佢保證會列出所有開支嘅單據,確保善款都會用喺治病方面。

劉梓浩喺週日嘅帖文上表示,醫生建議佢使用新型標靶藥Blincyto(Blinatumomab),以減少骨髓中殘留嘅壞細胞,以便增加骨髓移植嘅成功率。劉梓浩解釋,Blincyto係美國FDA認可處方藥物,價錢大約50萬港元,並且已經成功喺香港註冊,但就尚未納入《醫院管理局藥物名冊》,無法申請政府嘅「撒瑪利亞基金」同「關愛基金」資助。

幸好,佢得到「愛能助基金」伸出援手,資助七成藥費,餘下三成藥費亦獲數位有心人代為支付,解決第一次藥費嘅燃眉之急,但醫生亦坦言未來或有需要再次用藥,但無奈因為疫情關係,令佢自去年12月起處於零收入狀態,佢唯有發起眾籌,希望籌60萬元,其中50萬用於第二期藥費,其餘10萬就用作其他醫療費用以及手術後康復期間嘅日常基本開支。最終用咗1日時間,就超額籌得250萬,令佢非常激動,又話有咗呢筆捐款之後,會同醫生商量睇下有無更好嘅療程選擇,有定案之後會再同大家公布。

原圖:FB@Tsz Ho Kelvin Lau