香港爆發第三波新冠肺炎疫情,曾經連續多日出現過百宗確診個案,對醫護人員造成沉重嘅工作壓力。最近有一位普通科門診醫生,喺Facebook專頁「HA Secrets」投稿訴苦,表示最近遇到一名因為喉嚨痛求醫嘅女病人,不滿輪候時間長之餘,批評醫生著防護裝備,仲指罵醫生「咁怕死唔好做醫生啦」,令佢既感到憤怒,又感到委屈。帖文引嚟唔少網民留言鼓勵,並批評呢位女病人言行不當。

呢位普通科門診醫生喺帖文表示,呢位因為喉嚨痛求醫嘅女病人不滿輪候時間太長,就大聲吵鬧:「又話叫人少啲出街,又話叫人唔好聚集,睇下喉嚨痛都要等成個鐘」。見到醫生又鬧:「又口罩又面罩,仲要將我張櫈攞到九丈遠,你哋醫生啲命就特別矜貴嘅,我條命呢就唔值錢嘅!」醫生無理會,繼續睇症,問女病人嘅旅遊、職業、接觸同群聚史,同佢檢查完頸淋巴結之後,就開藥俾佢同埋叫佢做深喉唾液檢測。呢個時候,佢又再指罵醫生:「喉嚨痛喉嚨都唔睇吓,你有無醫德㗎?咁怕死唔好做醫生啦!係咪我有肺炎你就由得我死唔醫我呀?」,醫生聽到之後覺得憤怒同委屈,亦感到洩氣。

醫生喺帖文亦提到,工作期間亦會遇到一啲心地善良嘅公公婆婆,向佢表達謝意,又會關心佢叫佢多啲休息。

原圖:大公報