本港新冠肺炎確診數字持續高企,唔少市民為咗減少外出,都提早掃定一大堆擺得耐嘅食物返屋企,雞蛋一定係其中一樣。不過,雞蛋除咗擺雪櫃,仲有咩延長保鮮期嘅方法?點樣自己check隻蛋仲食唔食得?睇落去你就知~

之前專家都有教,食物擺落雪櫃前要先洗下、消毒下個包裝,不過呢個方法就唔適用於雞蛋。因為蛋殼上有一層表層膜,可以阻止蛋殼上嘅細菌滲進蛋內。清洗蛋殼後,反而有利微生物進入蛋內。而殘留喺蛋殼表面嘅水分,亦可能有助蛋殼上嘅細菌繼續生存。而擺雞蛋嘅方向亦有講究,就係將蛋尖向下,因為雞蛋較圓嘅一邊有氣囊,當蛋尖向下,氣室向上,雞蛋就處於最自然狀態。相反,蛋尖向上會令氣室內殼膜受壓而脫離蛋殼,影響保護膜,好易令雞蛋變質。

如果唔記得雞蛋買咗返嚟幾耐,仲食唔食得,「Too Good To Go」創辦人Jamie Crummie教大家一招簡單測試,就係將雞蛋放喺凍水入面!如果雞蛋沉落水底、平躺,就表示十分新鮮;假如雞蛋沉落水底但豎立住,就唔多新鮮,但仲食得;若果雞蛋浮喺水面咁就代表已經唔食得。

圖:網上圖片