新冠肺炎大爆發,各行各業都受到影響,但說到影響最大,好可能係旅遊業。曾經三度登上珠峰,近年開設公司舉辦海外登山活動嘅曾志成,亦被疫情打亂計劃,境外活動全部停頓,連搞本地遊都因為本港第三波疫情而延期,但佢選擇樂觀面對:「做人要望遠啲,展望2021年,疫情解決後,人都要旅行嘅。」就好似登山一樣,盡力攀高峰,但也要量力而為,明白自己嘅限制,先至可以繼續向前行。

登山係生命一部分

曾經三度攀上世界最高珠峰嘅曾志成,直言自己只係普通人,面對疫情,都會有唔開心嘅時候。而且佢係唔可以停落嚟嘅人,一停低就會諗啲唔好嘅事,早喺23月時候,佢曾經搞過室內版攀登世界七大洲最高峰嘅活動,希望喺疫情期間,俾大家一個目標,鼓勵大家唔好放棄,其後搞本地團,帶大家遊火石洲、沙塘口山,現時亦會搞電子商貿,務求令自己Keep住忙碌,唔會胡思亂想。

曾志成同山結緣於中二嘅時候,因為同學參加外展訓練課程,回校後興勃勃約大家去爬山,由於學校後面就係屯門徑,大家放假時就一齊去行山,對曾志成嚟講,行山係最低消費嘅娛樂,因此樂此不疲!畢業後佢加入外展訓練學校做教練,邊做邊學,後嚟又自組公司幫企業做培訓,2014年更開設「登山達人」,專門帶人到海外行山。直至舊年,佢每年內都會有一百日喺山上,曾志成自言登山已經「入血」,係佢生命嘅一部分。

登山領悟人生道理

登山不但係佢嘅興趣同事業,亦令佢領悟到做人嘅道理:「人其實好渺小,人假如自大狂莽,好容易就會被大自然KO,所以大家要知道自己嘅能力,準備功年要做足。」而且人在山上,會更加認識自己:「人喺山上面,就要時刻做決定,太冒險,山唔會可憐你,隨時出意外,太保守,又永遠唔會成功,行山嘅藝術就係要喺兩者之間取得平衡,保守地估計風險,呢樣都係一種學習嘅地方。」

曾志成直言年輕時唔識死,但隨住經驗愈多,愈明白做錯一步就可能無命!所以佢依家每一步都會諗清諗楚:「山不會呃你,喺山上要學習誠實面對自己,唔可以做一啲不切實際的行動,否則山會好快還番俾你。」

2007年,佢遇上最嚴重嘅意外,爬西藏高山時不慎跌落山,折斷右小腿,回港留醫個多月,醫生表示以後都唔可以再行山,曾志成憶述喺醫院嘅日子,係佢人生中最黑暗嘅時候,但佢唔服氣,200711月出院,2008年努力做物理治療,恢復得好快,2009年已經成功登上珠峰。由此佢得到啟示:唔好因為意外挫折而放棄!意外唔重要,最重要係起番身,並作為一種經驗同教訓,繼續去面對挑戰。

近年佢亦會帶兒子一齊登山,但佢咁做並唔係要子承父業:「帶佢登山,影響到佢對我嘅睇法,因為大家都覺得我做呢啲事好危險,究竟為咗乜?我想話俾佢知,其實我登山嘅動力就係要分享一種信念俾其他人:只要唔放棄,不停學習不停解難,就有機會成功,成功係日積月累先做得到,跟平時做人做事也一樣!」

圖:受訪者提供


曾志成坦言登山已經「入血」,係佢生命嘅一部分。


曾志作三度登上珠峰,係香港第一人。

近年曾志成開設「登山達人」,專門帶人到海外行山,可惜疫情關係,一切境外活動都要暫停。


近年佢亦會帶兒子一齊登山。