新冠肺炎肆虐全球,人人聞之色變,如果你曾經同疑似新冠肺炎確診者同車,你會點做?內地一位的士司機丁林就展示咗一套「教科書式操作」,佢曾經接載過一個同確診者接觸嘅乘客,將乘客安全咁送去指定檢測中心之後,佢拒載其他乘客,自我隔離,被網友大讚做得好。

丁林上個月尾接載過一個乘客,呢個乘客上車後不斷打電話俾朋友話自己急住入醫院,仲多次提及「新冠肺炎」、「核酸檢測」等詞。丁林就問乘客,乘客亦老實坦承自己曾經同確診者搭過同一車廂嘅火車,所以防疫部門就打俾佢叫佢去做檢測。丁林聽完覺得好驚,但佢又無得中途放低個乘客,因為佢落咗車之後肯定又會搭第二架車,到時影響更大。雖然當時丁林同乘客都有戴口罩,但丁林都擔心會傳染俾其他人,於是丁林載咗乘客去指定檢測地點之後,自己即刻收車唔載客,佢其後被安排到附近旅館隔離。

好彩最後丁林同個乘客嘅檢測結果都呈陰性,而丁林嘅舉動亦被網友大讚。回憶起呢段經歷,丁林話:「家裡人說我傻,冒著那麼大的風險。但我不後悔,如果我讓他下車了,我心裡過不去這個坎。」

圖:微博@滴滴出行