新冠肺炎疫情期間,市民都減少外出食飯,多咗買外賣,令香港嘅外賣塑膠消耗量大增。有環保團體表示,情況持續嘅話將對生態造成難以補救嘅災難,建議政府要宣傳減少使用即棄包裝及餐具,鼓勵市民自備。

綠領行動喺今年4月進行咗一項調查,發現港人外賣塑膠消耗量大幅上升,每人每星期使用5件以上即棄塑膠比率,膠餐具由去年嘅10%上升至疫情期間嘅30%,塑膠器皿就由去年嘅12%上升至疫情期間嘅45%,估計疫情期間港人每星期合共消耗咗1.018億件即棄塑膠,數目認真驚人,然而調查嘅時候仲未實施禁堂食嘅規定。

綠惜地球總幹事劉祉鋒就表示,每名市民一餐外賣就可以製造7件即棄塑膠餐具或包裝,包括膠叉、膠匙、膠刀、飯盒、紙杯、紙杯蓋、飲管等,如果一日三餐都食外賣,一個禮拜就已經消耗大約150件塑膠。

多個環保團體表示,當局應加強教育市民減少使用即棄用具,又建議如果市民願意自備,政府可以資助食肆提供優惠,鼓勵減廢。

原圖:商報