最近東京澀谷一個公園出現咗一個設計獨特嘅公廁,引嚟網民熱烈討論。呢個公廁由玻璃外牆建成,當無人用嘅時候就會呈透明狀態,外面嘅人可以睇到裡面情況,但當有人入去使用,一鎖門玻璃就會變成唔透明。雖然呢個公廁設計時尚,不過有網民就覺得無安全感,驚去去下廁所,突然故障變透明,反對使用呢種設計。

有日本網民喺上週五(7月31日)將呢個「透明公廁」相片上載至Twitter,廁所一共設有3格,分別呈粉綠、粉紫同黃色,當無人使用嘅時候呈透明狀態,有人入內鎖門就轉變成唔透明。相片上載至Twitter之後,引嚟唔少網民轉發及討論,有網民指出呢個設計其實係為咗保護使用者,避免有歹徒匿喺廁所入面襲擊使用者,而以往就發生過唔少呢類嘅性犯罪案件。

但亦有網民指個設計奇怪,覺得好無安全感,憂慮使用期間突然變透明。有網民指出,早喺2014年九州大分市若草商店街就已經有呢款廁所,背後原理就係使用電控液晶玻璃,當通電嘅時候就會改變液晶分子排列,令光線通過,讓外面嘅人睇到裡面嘅情況,一旦斷電液晶分子就會恢復不規則排列,令光線散射、玻璃變成不透明狀態。

原圖:Twitter@yukio