嚟到夏天,唔少人出完街或者做完運動返到屋企,就即刻開大冷氣、沖凍水涼,但其實咁樣隨時會搞到中風㗎!內地最近就有一名男子,出去跑完步返到屋企,即刻吹冷氣、沖涼,一覺瞓醒就發覺半身郁唔到,連個嘴都歪埋,家人送佢入院檢查後,證實佢係中咗風。

根據內地傳媒報道,呢名浙江杭州50幾歲姓王嘅男子,本身有做開運動,早前出去跑步流晒大汗,返到屋企開冷氣、沖涼,之後就喺梳化瞓覺。王男瞓醒發現,自己嘅左手左腳動作遲鈍,手機都拎唔到,行路仲拐下拐下,後來全身發麻,說話含糊,於是家人就將佢送入醫院。

檢查後,醫生診斷佢係中風,留醫三日之後身體逐漸好返,手腳恢復氣力,可以正常行走。醫生指出,王男中風係同大量出汗、無及時補充水份有關。佢解釋,出汗之後身體嚴重缺水,血液濃縮變得粘稠,再加上吹冷氣,令血管收縮,造成血栓。再加上王男有吸煙習慣,令血管輕度狹窄,好彩及時求醫,如果唔係就會有後遺症。

原圖:新浪、都市快報