社企「銀杏館」注重推動長者就業,疫情期間生意唔太好,佢哋亦無改初心,繼續派免費飯俾有需要嘅人,仲不時喺FB專頁分享員工故事,發放正能量。今次嘅主角係油麻地店嘅廚工芬婆婆,佢後生嗰陣老公早死,一個人湊大兩個仔,又要顧住打工搵錢,又要做家頭細務接送囝囝返學,日子非常難過。宜家芬婆婆終於捱出頭,兒孫滿堂,用心為屋企人煮飯,亦用呢份心機整嘢食俾銀杏館嘅客人食。

當年芬婆婆嘅細仔先2歲,丈夫就過身,芬婆婆於是開始上演佢嘅「阿信的故事」,獨力養大兩個仔:「我當時踩住單車,前抱大仔後背細仔,日日湊返學放學買餸,又要顧住打工搵錢又要做家頭細務,我真係好慘。」不過,日子再難過都好,芬婆婆亦捱過嚟,已經仲多咗4個孫仔。芬婆婆放工後堅持要親自為屋企人煮飯,佢話「d 孫好鬼奄尖,唔好食唔會俾面係即刻停筷子唔食,我煮既野佢地個個就話好食……」50年後再回望,芬婆婆話:「當年我真係好難過,但係都過到,今日香港好難d野都會過……」

圖:FB@銀杏館